جوزيني ياما

يانساء العالم اتحدوا
فأنتن محتاجين الي بعض التوعيه السليمه

سعات بحس ان احنا مغلوبين علي امرنا ...ازاي ...
من هنا تبتدي الحكايه
الأم :يابنتي ام فاروق جرتنا جيبالك عريس يبقي ابن اختها وعيزاكي تشفيه
البنت:لاياماما انا مش عايزة اتجوز بالطريقه دي
الأم:مش عايزة تتجوزي بالطريقه دي ازاي اومال هتفضلي قاعده جنبنا كدا يابنتي احنا عايزين نفرح بيكي ونغيظ جرتنا ام شوقيه الفرحانه ببنتها اوي دا حتي انتي احلي من بنتها بس سبحان الله عرسها زي القمر انا عارفه اتجوزها ازاي واهي اتجوزت اهي وخدها معاه السعوديه

البنت: اللي يجوز يجوز انا مش هتجوز بالطريقه دي ومتحاوليش معايا وسبيني الوحدي دلوقتي عشان انا مخنوقه
وبعد خروج الأم تبدأ البنت بالبكاء وهي لاتعلم ماهو مسيرها الأسود ان تزوجت او لم تتزوج وهل عليها فعلا ان تستمع لكلام امها ام تظل جنبها ويطلق عليها حين اذا عانس مع مرتبه الشرف
ال

الأم :يابو محمد الحق بنتك مش راضيه تشوفه وقال ايه مش هتتجوز بالطريقه دي

وبعد سماع ابو محمد لهذا الكلام فقد جن جنونه لخوفه علي بنته التي سوف تجلس بجانبه بسبب هذا الكلام ودخل عليها غرفتها ....
الأب :ايه اللي انا سمعته داه هيجي الولد وهتشوفه والا هتفضلي قاعده جنبنا وبعديها يا اما ترفضي او توافقي
الأم:ايه يابنتي ما كل الناس بتتجوز ب الطريقه ديه ايه هتغيري الكون دا حتي انا والحج ابو محمد ابوكي متجوزين كدا دا اول ماشفني اتسطل ووافق علطول مش كدا يابوا محمد
ياعيني رغم ان الراجل معيشها ايام سوده وكل يوم بيفطرها ويعشيها ويغديها ب الضرب بس اهي ست اصيله
الأب :طبعا ياامو محمد وبينه وبين نفسه (الله يلعن اللي يوم الشفتك فيه )
طبعا مهما اصلا مش بيعجبهم العجب ولا الصيام في رجب
البنت: خلاص يابابا اللي تشوفه
الأب :خلاص ياام محمد قولي لأم فاروق جارتنا تقلهم يشرفونا الخميس الجاي

يااااااااه اد ايه احنا بننظلم ومع ذلك الرجاله بيحسيسونا ان احنا مفروضين عليهم الراجل بقي اللي امه لما تقوله تعالي يابني شوف فلانه بنت فلانه يقولها لا انا مابرحش اشوف حد ويختار بنفسه ويروح هو كدا راجل ملو هدومه يتقدم مش ياخد البيت كله معاه يتفرج

وجاءت اللحظه الحاسمه.....عندما ذهب العريس الي منزل العروسه المغلوبه علي امرها
وبعد حوار كبير بين اهل العروسه واهل العريس وطبعا خلاص البت شافته وهو شافها
تهمس الأم همسات في اذن ابنها المحروس (ايه رأيك ياابني )

والمحروس طبعا قال موافق خلاص يبقي البنت لازم توافق وخير البر عاجله ويالا الفاتحه بقي وطبعا بعد ماخدوا رأي البنت وهي طبعا عايزة تفرح اهلها بيها ومتزعلهمش بغض النظر عن العيوب اللي فيه طخين وقصير وسنته طايره وحالته حاله
وبعد الطرفين خلاص موافقين بقي يبدأ سلق البيض وهما لن يعلموا مصير ابنتهم المؤساوي


في بنات كتير جدا بيتحطوا في المواقف دي بسبب الهروب من مرض العنوسه ومتبقاش عانس وتبقي سيرتها علي افواه الغير عقلاء ومعظم الجواز بهذه الطريقه بيكون جواز فااااااااااااااااااااشل لان البنت ياعيني بتبقي مغصوبه تتجوز والأمور والخلفات البتحصل بعد الجواز دي وزي مابيقولوا بعض الرجال الست بتعتي منكده عليا عشتي هتكون منكده عليه عشته ليه ان شاء الله مش من عمايله السوده البتخلي الست تغلي من جواها
لا بقي هي لازم تكون زي الخاتم في صباعه يعمل اليعمله وهي تقله سمعا وطاعا ياسيدي
والمشكله الكبيره بقي ان الراجله كلهم بيتغيروا بعد الجواز يعني يقعد يعمل نفسه الواد اوي رومانسي قبل الجواز وكل يوم هدايا وكل دقيقه اتصال ازيك دلوقتي انتي بتعملي ايه .. تصبحي علي خير ..تعرفي انا حلمت بيكي امبارح احلمي بيا انتي انهارده

وبعد الجواز يقعد يضرب فيها كأنها جاريه عنده ويتحول الي فك مفترس لو عملتله محشي يقولها ايه الأكل داه انتي ايه مابتفهميش انا قلتلك مكرونه بشمل ...لو أتأخر في الشغل وخافت عليه ليكون حصله حاجه وتتصل بيه يقلها انتي بتتصلي بيا ليه هكون فين يعني ياست هانم بشتغل عشان اتفحك انتي وعيالك ولاعملالي فيها المفتش كرومبو


بجد انا زعلانه علي حالنا اووووووووووووي وياريت عاجب لا بيفتكرونا متطفلين عليهم وبيفتكروا ان الست بتطلب الطلاق طمعا للمأخر والبيت والعفش ماهما رجاله طبعا مابيحسوش الطلاق دا بيأثر في الستات اد ايه وازاي بتتعقد لو جزها سبها وازاي بتاخد كلام من الناس علي الرايحه والجايه


لكن للأسف كل اللي بيحصلنا داه بسبب ان احنا مش بنتقي ربنا والرسول صلي الله عليه وسلم كان بيعامل زوجاته احسن معامله وكان حتي دائما يستشرهم مش بيعملهم زي اي كرسي في البيت مالهاش رأي ولا قيمه خالص

ف النهايه لو سواء الست اتقت ربنا ف جوزها او الراجل اتقي ربنا ف مراته ربنا هيخلي حياتهم ذي العسل ومافهاش مشاكل بس مين بيتقي ربنا ف حد ف الزمن داه
ومن يتقي الله يجعل له مخرجا )